Қайырымдылық – жылы жүректен
Қазіргі заманда жастар тәрбиесінде жүректі имандылыққа, махаббатқа, қайырымдылыққа, нұрландыруға, ізгі іс жасауға және жүректен жүрекке арқылы адам жанына әсер ету үрдісі кең ауқымда талқылануда.
Адам баласының жақсы қасиеттерінің асылы – жомарттық, кең пейілділік, мейірімділік. Қайырымдылық - халқымыздың ең ізгі қасиеттерінің бірі. «Жанашарлыққа – жан риза» дегендей, жүрек жылуын ұсыну, сауабы мол іске ат салысу әрбір адамның азаматтық парызы.
Адам өміріндегі ең игі істерінің бірі – мұқтаж жандарға қамқорлық жасау. Адамдар бір-біріне қайырымдылық, мейірімділік таныту арқылы жақсылық жасайды. Қамқорлықты қажет ететін жандарға қол ұшын беру арқылы адам баласы жақсылыққа қадам бастайды. Осындай бастаудың бірі Т.Рүстембеков атындағы орта мектебінде де болды.
2020 жылдың 14 ақпанында Т.Рүстембеков орта мектебінде қамқоршылық кеңес мүшелерінің ұйымдастыруымен "Жүректен жүрекке", «Мейірімді жүректер ынтымақтастығы» атты қайырымдылық акциялары өтті.
Қайырымдылық акцияның мақсаты аз қамтылған отбасынан шыққан балаларға, мүмкіндігі шектеулі балаларға қуаныш сыйлап, қамқорлық көрсету, балаларды адамгершілікке, мейірімділікке баулу.
Осы мақсатта ұйымдастырылған қайырымдылық акциясы барысында көмекке мұқтаж 6 жанұяға азық-түлік таратылды. Әр отбасына тұрмыстық көп тұтынатын ұн, қант, май, макарон, күріш, шай, печенье, тәттілер таратылды. Осы акцияны ұйымдастыруға мектебіміздің ата-аналары, демеушілері, ұстаздары, оқушылары үлкен үлес қосты. Шара барысында қамқоршылық көрсеткен ата-аналарға, демеушілерге, ұстаздарға арналған концерттік бағдарлама ұйымдастырылды. Балаларға деген жүрек жылуын бөлісуге атсалысып, мейірімділік пен жомарттық танытқан қамқоршылық кеңеске, демеушілерімізге, ата-аналарымызға мектеп атынан алғысымызды білдіреміз.
Бала – бауыр етіміз, балаға жасаған жақсылық – өзімізге жасаған жақсылық деп білейік! Сондықтан да балалардың өмірі жарқын болып, аман болсын!
Аялы алақанымызды, қолұшымызды созып, қайырымдылық жасап, көмек қолын күткен әрбір жанның жүрегіне жылылық ұялатып, өмірге деген көзқарасын өзгерту – барлық адамзаттың борышы. Мектебімізде әлі де осындай игі істер жалғасын табады деп сенеміз.
Керимбекова Л.А
Т.Рүстембеков атындағы орта мектебінің
Қазақ тілі пәнінің мұғалімі